Fitness Egypt 
فيتنس ايجبت | حرق دهون البطن في 6 اسابيع بفكره بسيطه
الاسبوع الاول / "امنعي السكر الابيض تماما"
السكر الابيض هو اسوء حاجه بتدخل جسمك
وبيخزن دهون كتيره فى محيط الخصر والبطن.
فى البدايه هتحسي الموضوع دا صعب عليكي
عوضي العصاير إللى بتحطيلها سكر بإنك تاكلي الفاكهه سليمه
والمشروبات كمان اتعودي تشربيها من غير سكر
او ممكن تستبدلي السكر الابيض بسكر دايت زي استيفيا
وفيه مشروبات كتير تقدري تشربيها من غير سكر
زي الشاي الأخضر والنعناع والينسون والزنجبيل
كمان المشروب إللى هيساعدك قوي فى التخلص من احساسك بإنك عايزه تاكلي حاجه مسكره
هو مشروب "القرفه" جربيه وهتلاحظي الفرق بنفسك
طبعا الحلويات ممنوعه تماما لأن كلها سكر
الا لو هتعمليها بتحليه تانيه زي الميبل سيرب أو دبس التمر أو العسل
وكل دا يكون بكميه بسيطه..
ونصيحه لازم تجربيها.. وهي انك تستغني تماما عن أي حاجه بتضرك كأنها مش موجوده اصلا.
الاسبوع التاني / "امنعي الاكل الجاهز من بره"
وكلي من اكل البيت براحتك مع الالتزام بطبق سلطه أو خضار متقطع بجانب اي وجبه.
الاكل إللى فى المحلات عشان يبقي طعمه حلو وتاكلي منه بكلميات كتير بيكون مليان دهون وزيوت وسكر .. وكل دا عباره عن دهون هتتخزن فى البطن بشكل اساسي.
الاسبوع التالت/ "متاكليش اكل مقلي فى زيت غزير"
لكن هتبدليه بإنك تسويه فى الفرن.. أو تشوحيه فى زيت صحي او سمنه بكميات قليله
مش للتسجيل 👈((كلمه تشوحيه دي كلمه فلاحي من خير مزارعنا 🤣 حاولت ادور على الكلمه البديله مقدرتش اجمع خالص فى الوقت دا ... اكيد الناس فاهماها))
الاسبوع الرابع / "قسمي وجبتك الكبيره لاتنين صغيرين" يعادلو نفس كميه الوجبه الكبيره
يعني لو بتاكلي مرتين فى اليوم وجبتين كبار
قسميهم على اربعه صغيرين خلال اليوم
الاسبوع الخامس / "مفيش اكل بين الوجبات"
يعني لو فطرتي متكليش حاجه تاني غير فى معاد الغذا ... وقفي خالص النقنقه بين الوجبات
الاسبوع السادس/ "خلي الطبق بتاعك متوازن"
هتقسمي الطبق لنص وربعين
النص هيكون خضار سواء سلطه أو خضار متقطع او خضار سوتيه
الربع هيكون بيروتين سواء لحمه أو فراخ أو سمك أو بيض أو جبنه
الربع التاني هيكون كارب معقد زي الارز أو المكرونه أو البطاطس أو عيش
________
بعد الست اسابيع دول هتكوني حطيتي رجلك على بدايه التغذيه الصحيه
إللى هتخليها اسلوب حياتك
وهتلاقي معدتك اتعودت على الكميه المناسبه ليها
وبتحسي بالشبع على طول
هتتعودي انك تاكلي أما تجوعي بس
وانك اما تاكلي مش هتبقي عايزه تشبعي بنسبه ميه فى الميه وإللى هتخلي نفسك صعب وحركتك تقيله.
ممكن بعد كدا تعملي كل ١٠ أيام وجبه فري تاكلي فيها براحتك
دا اذا حسيتي انك محتجاها
لو عديتي ال٦ اسابيع دول ملتزمه مش هيبقي عند احساس انك عايزه تاكلي حاجات مسكره أو مقليات
وهتلاقيها بتتعب معدتك أما بتاكليها
لأن وقتها هتكوني نضفتي معدتك فعلا وعودتيها على الاكل الصحي والمفيد.
