فيتنس ايجبت | ترهلات الثدي ورفع الثدي لأعلي

لو عندك ترهل فى الثدي أو عايزه تتجنبي انه يحصلك ترهل وانتي بتعملي دايت ،، يبقى لازم تشوفي الفيديو دا للاخر .
هعرفك ليه بيحصل ترهل للثدي ... وهقولك على التمارين إللى هتخلصك من المشكله دي بنسبه كبيره.
_________________
عشان تحلي اي مشكله يبقي لازم تفهمي سببها ..

ثلاث اسباب اساسيه بيسببولك ترهل للثدي
👈السبب الاول // ضعف عضلات الصدر
والعضلات دي موجوده تحت الثدي
وهي إللى بتكون سانده الثدي ..
عضلات الصدر لو ضعفيه .. الثدي بيحصله ترهل على طول
🔥حل السبب دا ،،، انك تقوي وتشدي عضلات الصدر
بتمارين مقاومه تستهدف العضلات دي.
.........

👈السبب الثاني // تقوس الظهر والاكتاف
( إللى بنسميه عندنا فى مصر "الأتب" )
التقوس دا بيخلي الثدي مايل لأسفل ومسحوب مع الجاذبيه الارضيه
لكن لو ظهرك وكتفك مفرودين بشكل صحيح
هتلاقي الصدر اتجاهُ للامام
ودا بيقلل من نسبه وشكل الترهل فى الثدي
🔥حل السبب دا ،،، انك تقوي عضلات الظهر والكتف ، بتمارين المقاومه إللى هتستهدف العضلات دي
كمان تاخدي بالك اثناء المذاكره أو الشغل على مكتب... انك تتعودي تفردي ظهرك وانتي بتشتغلي... وبعد ما تخلصي تعملي شويه استرتشات للجزء العلوي من الجسم عشان ترجعي تفردي ظهرك تاني..
...........

👈السبب التالت// تمارين الكارديو الكتير بدون
تمرين مقاومه .. وكمان بدون ارتداء حمالات صدر مخصصه للتمرين
تمارين الكارديو بس من غير تمرينات مقاومه معناه ترهل فى كل الجسم مش فى الثدي بس
🔥حل السبب دا ،،، لو هدفك خساره وزن وهتعملي تمارين كارديو عشان تحرقي اكتر
يبقي لازم تدمجيها مع تمارين المقاومه
يعني خلصي تمارين المقاومه بتاعتك وبعد كدا اعملي كارديو
ومهم جدا انك تلبسي sport bra مقاسه مضبوظ عليكي ومُحكم .. ميكونش برا عادي أو واسع يخلي الثدي يتحرك بشده وبعشوائيه وانتي بتتمرني ..
يعني متكونيش بتجري أو بتنطي من غير sport bra لأن دا هيزود من ترهل الثدي

وحاجه تانيه ممكن تعمليها لو بتعاني من الترهل عموما
انك تتمرني هييت كاديو بدل الكارديو العادي ..
الهييت كارديو مميز انه بيحرق كالوريز اكتر فى مده اقل وكمان بيقوي عضلات الجسم.
لانه فيه دمج بين الكارديو والمقاومة.