تنحيف الكرش وأقوي تمارين بطن في البيت

فيديو النهارده هعرفكم فيه إيه علاقه تمارين البطن بتخسيس الكرش ؟ ، وكمان ازاى تتخلصى من الكرش وترهلاته تماما.
فى الفيديو دا هقولك فيه ازاى تنسفى كرشك بعقلك..
يعنى هتخرجى من الفيديو دا وانتى فاهمه هتعملى ايه عشان تتخلصي من الكرش...وكمان هتعرفى اقوى تمارين هتخلصك من ترهلات البطن إللى بتكون مزعجه جدا لكل السيدات
كمان هصححلك مفاهيم كانت غايبه عنك ومنعاكى من الوصول لهدفك
مفهوم خاطئ عند بنات كتير انهم أما يعملو تمارين للبطن كدا دهون البطن هتنزل ودا مش صحيح
انا كمان بلاقى بنات بتعمل تمارين البطن بأوزان عاليه عشان تنزل الدهون المتراكمه فى البطن.
بس فى الحقيقه مش التمارين دى هيا إللى هتجيب نتيجه معاكى ولا هتخلصك من الدهون ..

دهون البطن زيها زى اى دهون متراكمه فى جسمك،
زى الدهون إللى فى الظهر أو فى الأرداف أو الافخاد،
والحل الوحيد عشان الدهون دى تنزل
هو انك تعملى دايت منخفض السعرات الحرارية
وقتها الجسم هيكون مضطر انه ياخد من الدهون المتراكمه فيه
بس عشان الجسم ياخد من الدهون المتراكمه دى مش من العضلات يبقى لازم تاخدى بالك من نقطتين مهمين
النقطه الأولى/ هو انك لازم تاخدى كفايتك من البروتين عشان تحافظى على الكتله العضليه فى جسمك والجسم ينزل من الدهون مش من العضلات.
النقطه التانيه / لازم تتبعى نظام غذائي مناسب وميكونش قاسى جدا، ويفضل طبعا يكون صحى وكميه الدهون فيه منخفضه ، ودا لأن نظام الدايت القاسى بيدّخل الجسم فى مرحله حرمان، والجسم بيبدأ يترجم الدايت القاسى دا على انه مجاعه. فبيتمسك فى الدهون إللى فيه كوسيلة للدفاع عن الجسم وسلامته، وبالتالى يبدأ الجسم يفقد من العضلات والمياه والأملاح والفيتامينات إللى فيه، وفى الاخر خالص يلجأ للدهون لو استمريتى فى الدايت القاسى بالشكل القاسى دا، وغالبا محدش ابدا بيقدر يستمر فيه.
هسيبلك فى اول كومنت رابط تقدرى من خلاله تحسبى سعراتك إللى بيحتاجها جسمك
هقولك على أقوى تمارين البطن، بس قبل ما تعمليها سخنى جسمك كويس بشويه كارديو لمده ١٠ دقايق
التمرين الاول .. تمرين ال crunches
التمرين التانى .. تمرين ال reverse crunches
التمرين الثالث ... jumping Jack plank
التمرين الرابع ... side plank raises
التمرين الخامس ... mountain climbers
التمرين السادس ... bicycle crunches
الست تمارين دول كافيين انهم يشغلو عضلات بطنك كلها ويشدو الترهل إللى فى الجلد
اعمليهم كلهم وانتى محافظه على بطنك مشدوده ومنظمه نَفَسك وبالتكرار إللى تقدرى عليه
أو اعملي كل تمرين لمده ٤٥ ثانيه وريحى ١٥ ثانيه
وخلى stop watch جمبك تساعدك فى حساب الوقت

بعد ما تنهى التمرين اعملى كارديو على قد ما تقدرى
وزودى تدريجى كل مره

تمارين البطن هتعمليها يوم وتريحى يوم
الكارديو اعمليه كل يوم لو تقدرى أو خمس مرات فى الاسبوع لحد ما تتخلصي من الدهون الزياده فى جسمك
لو استمريتى على التمارين دى والتغذيه المناسبه
هتلاقى نتائج مؤكده وملحوظه جدا خلال شهر