كيف اعرف نسبة الدهون في جسمي وكيف اتابع تقدمي بعد تطبيق نظام التمارين والنظام الغذائي

بعد مالعبت واتمرنت ومشيت ع الدايت مظبوط اعرف منين ان خطتي نجحت او ازاي الاحظ التغيير في جسمي بشكل صحيح؟؟

في ناس بتكون ماشية مظبوط علي الدايت والتمارين.. بس بتكون زعلانة ان وزنها ثابت علي الميزان..علي الرغم من انها حاسة بتغيير في مقاسات جسمها..
عشان كدة تعالي نعرف ايه افضل الطرق لقياس مدي تقدمك في الدايت:

اول طريقة القياسات : ودي الطريقة اللي معظم المدربين بيتبعوها.. عشان يقيسو مدي تقدم النظام الغذائي..
الطريقة دي بتعتمد علي قياس محيط الرقبة من "تحت الذقن" ..وقياس الوسط من عند الصرة" . .وللسيدات قياس اكبر قياس للمؤخرة...

تاني طريقة المرايا .. دي تعتبر اسهل طريقة يعني كلنا بنعملها.. كل اللي عليكي بصي ف المرايا وقارني التغيير بالنسبة للاسابيع اللي فاتت..

طريقة before & after : دي اشهر طريقة موجودة حاليا.. ومنتشرة كتير اوي علي السوشيال ميديا.. بتتعتمد ببساطة انك تاخدي صورة ليكي كل 10 ايام او اسبوعين ..بحيث تكون الصور في نفس المكان بنفس الاضاءة ونفس زاوية التصوير..ويفضل تاخدي صورة امامية وصورة جانبية عشان تعرفي تلاحظي التغيير كويس..

في طرق تانية حديثة لقياس التقدم :
زي برجل قياس الدهون: ده بيعتبر من ادق الطرق لقياس نسبة الدهون ..لكنه مش موجود في الدول العربية بسهولة..

في كمان جهاز الانبودي : الجهاز ده مؤخرا بقي منتشر في الصيدليات والجيمات ومراكز التخسيس..
بس مشكلة الجهاز ده.. انك عشان تاخدي منه قرايات صحيحة قدر الامكان.. ليه شوية متطلبات..
منها ان يكون الجهاز بنسخة حديثة.. وانك تكوني بتقيسي وزنك كل مرة بنفس الملابس ونفس التوقيت ..
بالاضافة اانك متقيسيش في درجة حرارة عالية..
و تقفي علي رجليكي كام دقيقة قبل القياس ..لضمان توزيع جيد لنسب الميه في الجسم..
كمان بيتطلب انك تقيسي وانتي علي معدة فاضية.. وتجنبي القياس اثناء الدورة الشهرية..
كل دي عوامل بتساعدك تاخدي قراية صح قدر الامكان من جهاز الانبودي..
--
وبكدة نكون عرفنا ازاي نقيس مدي تقدمنا في الدايت وطرق القياس المختلفة..
لو استفادتي من الفيديو متنسيش تعملي لايك..
واوعي تنسي تشتركي في القناة عشان ميفوتكيش اي فيديو جديد بنعمله