كيف تتخلص من القلق فى 5 خطوات

مفيش حد مننا مابيقلقش . بنقلق بسبب الشغل و المسائل الشخصية و حتى على الظواهر الكونية اللى مالناش اى كونترول عليها زى الحر و البرد  
بنقلق من حاجات محددة أو من حاجات مبهمة وغير محددة 
بنقلق اللى خايفين منه يحصل او اللى بنتمناه مايحصلش  

 والقلق مش بس مشكلة نفسية لأ ده ممكن يؤدى لأمراض جسمانية كتير 
القلق بيسبب ارتفاع ضغط الدم و بيزود اعراض الربو و بيلخبط الجهاز الهضمى من حموضة لقرحة لقولون عصبى
و من الأسباب الرئيسية للسمنة .
بيسبب الاكتئاب . حتى الالزهيمر بيتدهور بسبب القلق
مش بس كده ده كمان القلق بيخليك تكبر بسرعة و زى ما بيقولوا بيقصر العمر

وفيه طرق كتير للتعامل مع القلق و السيطرة عليه او التخلص منه
لكن النهاردة هنتعرف على وسيلة عملية من 5 خطوات بسيطة هتساعدك في التخلص من قدر كبير من القلق

 
1. تجميع المعلومات
معظم القلق سببه اننا مش عندنا معلومات كافية
المعلومات هتوضح لك ابعاد المشكلة بالضبط و توضح ليك الرؤية و الاختيارات المتاحة بمزايا و عيوب كل اختيار فتقدر تختار و تاخد قرار 

2. تحديد اسوأ ما يمكن ان يحدث  
لما بتتقبل الأسوأ بتحرر الطاقة اللى كانت مربوطة في دايرة القلق دى عشان تستخدمها في البحث عن الحلول

3. التفكير فى الحلول 
بعد استعدادك لتقبل الأسوأ اى حاجة هتعملها هتحسن النتيجة عن الأسوأ اللى انت أصلا رضيت بيه فانت كسبان كسبان .

4. العيش في حدود اليوم
طيب اتفقنا اننا هنركز على الحل
مهم في المرحلة دى انك تعيش في النهاردة ماتقعدش كل شوية تسيب الشغل اللى في ايدك و تقول ياترى هيحصل ايه بكرة
 
5. الرضى
طيب لو مافيش حاجة بايدك . حصلت حادثة و العربية اتكسرت . الجنيه عام و الالف جنيه اللى معاك بقوا خمسماية هتموت نفسك
لا ده امر واقع تقبله وارضى بيه

طبعا بالتوازى مع الطريقة دى ماتنساش الدعاء و الصلاة . لأن لجوءك لربنا هيهون عليك كتير و طبعا ربنا سبحانه وتعالى مدبر الأمور و ممكن يحل مشاكلك من حيث لا تحتسب  
و طبعا فيه وقت للعلاج النفسى فى حالات معينة . لو لاقيت القلق مسيطر على حياتك لدرجة انك مش قادر تفكر أو تتحرك أو حسيت بأن حياتك في خطر الجأ للطبيب . أحيانا بنحتاج لمساعدة خارجية