لماذا نكره أصواتنا؟

مش لوحدك متخافش محدش فينا بيطيق يسمع صوته\ هتلاقي نفسك مصدوم ومتفاجئ كل مرة بتسمع فيها صوتك\ أو استحالة تبعت فويس نوت من غير ما ترجع تسمعها وتمسحها وتسجلها 17 مرة تقريباً وبرضو مش حاسس بالرضا بينك وبين نفسك\ وتفضل تسأل أصحابك وحبايبك يا جماعة بالله عليكو هو دا صوتي؟ دا صوتي!\ انتوا بتسمعوني كده؟؟ حتى أنا شخصياً ممكن تلاقيني بضايق وأنا بتفرج على الحلقة واسمع صوتي!\ دا صوتي!
الناس بتبقى فاكرة إنه عادي يعني الموضع نفسي أو عدم ثقة في النفس مش أكتر\ بس الموضوع طلع أكبر مننا يا جماعة\ الانزعاج من سماع صوتك هو شعور شائع جداً بين البشر\ حالة اسمها Voice Confrontation أو المواجهة الصوتية\ ضم جنب أخواتك\ بس السؤال بقا.. هل صوتنا الحقيقي هو اللي بنسمعه واحنا بنتكلم عادي؟ ولا صوتنا المتسجل؟\ أنا عارفة إن الإجابة ممكن تكون صادمة شوية\ بس للأسف الصوت اللي مش عاجبك دا هو صوتك الحقيقي!
إنت بقا بتنزعج منه ليه؟ لأن الإنسان بيسمع الصوت بطريقة مختلفة تماماً لما يكون هو المتحدث عن ما بيسمع حد غيرو\ والموضوع بيرجع لأسباب علمية بحته\ لأنك بتسمع الصوت من مصدرين مختلفين\ واحدة من خلال الموجات الهوائية والتانية من ترددات الأحبال الصوتية.
الاختلاف اللي بتحسه في الصوت بيرجع لطريقة عمل الجمجمة البشرية\ لأنك لما بتسمع صوتك وإنت بتتكلم فأنت بتسمعه من خلال سماعات داخلية موجودة جواك\ ودي عملية اسمها التوصيل العظمي\ أول ما بتتكلم فالأحبال الصوتية والشعب الهوائية بتصدر اهتزازات\ الاهتزازات دي بقا بتنتقل داخلياً للجمجمة ووراها قوقعة الأذن\ دا بالإضافة إنك سامعو من برا بردو\ ولأن جسم الإنسان عنده قدرة أكبر إنه ينقل النبرات الخفيفة واللي ترددها منخفض أكثر من الهوا\ فهتحس إن صوتك اللي إنت سامعو أكثر هدوء وأفخم وأغلظ عن اللي الناس بتسمعه.
أما الصوت اللي الناس بتسمعه فبينتقل من الهواء للأذن الخارجية دايركت\ يدخل ع الأذن الوسطى ووراهم القوقعة في الأذن الداخلية\ عشان كده بيكون الصوت حاد أكتر.
نرجع بقا لانزعاج حضرتك من صوتك\ بحسب الباحثة في دراسة الصوت ربيكا كلاينبرجر في معهد ماساتشوستس للتكنولوجيا الأمريكي\ قالت إن السبب النفسي ورا شعورك بالانزعاج\ هو إن المنطقة الدماغية الحساسة للصوت بتكون غير نشطة لما بنتكلم\ أما الدكتور مارتن بيرشال أستاذ علم أمراض الحنجرة بجامعة لندن البريطانية\ قال إن الشخص لما بيتكلم صوته بيمر من خلال جيوبه الأنفية ومن خلال المساحات الفارغة داخل راسه وبعدها ودنه\ ودا بيخليه يحس إن صوته مختلف\ وبما إن صوتك بيعبر عن شخصيتك\ فطبعاً هتحس إنه إيه الإحراج دا دا مش صوتي الحقيقي ياجماعة؟\ بس في خبر حلو\ صوتك اللي إنت شايفه مزعج هو مزعج ليك إنت بس\ يعني محدش غيرك هيحس بالاختلاف دا لأنهم من ناحية اتعودوا يسمعوا صوتك كده\ ومن ناحية تانية هما كمان أكيد بيعانوا من نفس المشكلة وحاسين بنفس الإنزعاج من صوتهم وكلنا منزعجين فعادي.
نفس الموضوع بقا بينطبق على الصورة\هو يوم العقد النفسية أنا عارفة\ ساعات تبقى خارج كده ومتأيف وحاسس إنك برنس كده في نفسك\ أو بعد ما حضرتك تقضي 3 ساعات ونص بتظبطي بس رسمة الآيلاينر\ والحماسة تاخدك وتقولي لنفسك إيه القمر دا\ نيجي بقا لفقرة الصور والسيلفي وصورني وأنا مش واخد بالي\ ونقطع بعض\ هنا بقا الصحاب ممكن يخسروا بعض للأبد.
ليه بقا الشخص القمر البرنس اللي كان في المرايا مش هو الكائن الغريب اللي بيطلع في الصور مع إنه هو؟
هنا بقا هصدمك للمرة التانية وأقولك إن الشكل اللي في الصور هو شكلك الحقيقي اللي بتشوفو الناس\ أما اللي بنشوفوا في المرايا فما هو إلا نسخة معكوسة من أشكالنا\ ومن كتر ما بنبص في المرايا كل يوم فاحنا اتعودنا على نسختنا المعكوسة
أما عدسة الكاميرا المسكينة المظلومة\ فبتشتغل بشكل مختلف عن المرايا\ بطريقة تشبه عدسة العين\ عشان كده أي عيوب أو عدم تناسق في ملامح وشك بتبان طب ليه يارب مخلقتنيش معكوسة؟
وبحسب دراسة عملتها جامعة ويسكونسن الأميركية\ الناس بتعجب بنسخة وشك اللي بالنسبالك مقلوبة أكتر من المقلوبة اللي أنت معجب بيها
يعني من الآخر الناس اتعودت إنها تشوف وشك مش معكوس فاحبينك كده\ ومش هيلاحظوا أبداً الفرق بين طول الرمش الأخير في عينك اليمين إنه أطول من الشمال.. يارب تكون الرسالة وصلت.. سلام





للمزيد من الفيديوهات تابعونا على موقعنا الرسمي: https://www.mohtawa.ae


تابعونا على:
ـــــــــــــــــــــــــــــــــــــــــــــــ
Official Website| https://www.mohtawa.ae
Facebook| https://www.facebook.com/mohtawaae
Twitter| https://twitter.com/mohtawaae
Instagram| https://www.instagram.com/mohtawaae
محتوى منصة تهتم بالشباب العربي المعرفي من مواضيع تشمل "علوم - ثقافة - اجتماع - فضاء - تاريخ - طب - صحة - لايف ستايل - فن - رياضة - أخبار - سياسة - برامج