سر نجاح المقابلة الشخصية | الانترفيو السلوكى

الانترفيو السلوكى
بيجيلى أسئلة كتير بخصوص الانترفيو او المقابلة الشخصية
فيه ناس بتسأل ايه الأسئلة اللى ممكن تيجى لى و ناس بتسأل ازاى اتصرف و أقول ايه
و لأن الانترفيو جزء اساسى في التقدم لمعظم الوظايف حبيت الحلقة النهاردة تكون عن ازاى تستعد للمقابلة بالطريقة الصحيحة و تجيب على الأسئلة الإجابات اللى تقنع اللى بيعمل لك الانترفيو بأنك الشخص المناسب للوظيفة
في البداية احب أقول ان فيه النوع التقليدي من المقابلات و فيه الانتر فيو السلوكى
الانترفيو التقليدي
بيطلب منك تتخيل ممكن تعمل ايه في موقف افتراضى يعنى هتعمل ايه لو عميل غضبان اتصل بالشركة وانت اللى رديت على التليفون بالصدفة . المشكلة في نوعية الأسئلة دى انك ممكن تقول اى حاجة بينما لو اتعرضت للموقف فعلا ممكن تصرفك يكون مختلف
و لو راجعت نفسك هتلاقى ان ده بيحصل كتير بنشوف تصرف معين مايعجبناش و نقول ده انا لو كنت مكانه كنت عملت كذا لكن لما بنتعرض لنفس الموقف بنتصرف بطريقة مختلفة عن اللى توقعناها , بالعربى بنفاجىء نفسنا

كمان الانترفيو التقليدي بيستخدم نوعية الأسئلة المباشرة اللى بتسيب الكاندييت يجاوب على هواه زى ايه نقاط قوتك و ضعفك او كلمنى عن نفسك , هيعرف ازاى اذا كانت اجابتك صادقة واللا لأ و هل انت أصلا عارف ايه نقاط قوتك و ضعفك كتير مننا مابيعرفش

الانترفيو السلوكى
النوع ده من الانترفيو قايم على أساس ان السلوك و التصرفات السابقة هي أفضل وسيلة لتوقع السلوك المستقبلي
يعنى لما اعرف انت اتصرفت ازاى قبل كده في موقف معين اقدر استنتج هتتصرف ازاى لو اتعرضت لموقف مشابه في المستقبل
في الانترفيو هيطلب منك وصف تصرفك في موقف معين
اوصف لى اتصرفت ازاى في موقف كذا
زى اوصف لى موقف حصل معاك بيبين قدرتك على الابتكار

ازاى تستعد للنوع ده
• اقرا اعلان الوظيفة كويس و اكتب الشروط المطلوبة و المهارات
• ابحث عن الشركة اونلاين او بسؤال معارفك عشان تجمع اكبر قدر من المعلومات عن شغلها و جوها العام
بالمناسبة ,بستغرب لما ييجى حد في انترفيو و مايكونش عارف اى حاجة عن الشركة اللى جاى يشتغل فيها
• راجع السيرة الذاتية بتاعتك
ساعات الواحد بينسى السى في اللى كاتبها بايده
المراجعه هتساعدك تفتكر النقط اللى ممكن تتكلم عنها وممكن تحتاج تضيف بعض الحاجات بناءا على بحثك عن الشركة او تشيل حاجات مش متعلقة بالوظيفة دى
• قارن المطلوب بخبراتك
• حدد فين و امتى و ازاى قدرت تطبق المطلوب
• جمع و اكتب الأمثلة دى
حاول الاستعانة بامثلة قريبة و من الشغل
لو مالقيتش امثلة قريبة من الشغل دور على امثلة ابعد
لو مالقيتش امثلة من الشغل دور على امثلة من الجامعة او نشاط تطوعى او حتى شخصية و اجتماعية
• اعمل بروفة على الأسئلة و و اجابتك تخيل نفسك في الانترفيو و بتجاوب ممكن تقوم بالدور ده قدام مراية عشان تشوف شكلك و انت بتتكلم

STAR

عشان تنظم تفكيرك وانت بتكتب الحاجات دى و كمان وانت بتعرضها اثناء الانترفيو فيه طريقة لطيفة اسمها ستار
Situation
Task
Result
اوصف النتيجة اللى حصلت لما اتصرفت بالطريقة دى
ملحوظة : ساعات اللى بيسألك بيطلب منك مواقف سلبية او مشاكل عشان يعرف اتصرفت ازاى فجهز النوعية دى كمان لاكن احرص على امثلة انتهت بشكل ايجابى