سر الصندوق الأسود

هذا هو الصندوق الأسود الحافظ لأسرار الطائرات المتحطمة
وهو ما يتم البحث عنه حالياً بين حطام الطائرة الإندونيسية المنكوبة
لمعرفة السبب المؤكد لسقطوها ووفاة جميع ركابها البالغ عددهم 62 شخصاُ
من بينهم 10 أطفال و6 من أفراد الطاقم
ولكن ما هو الصندوق الأسود ولماذا لا يتحطم مع الطائرة ومن ابتكره؟

بالــ 1925 اجا عالدنيا صبي أشقراني بعيون زرق لعائلة أسترالية
سموه ديفيد..فات الصبي على المدرسة وبلش مشواره الدراسي
لصار عمره 9 سنين وتحديداً بالــ 1934
رجع عالبيت بعد الدوام وشاف والدته عم تبكي
ركض لعندها وضمها لتطلع بعيونه
وتقلو " والدك توفي في حادث طائرة يا ديفيد "
ردة فعل طفل على هيك خبر ما بتكون مفهومة بأغلب الأوقات
ولكن ردة فعل ديفيد كانت سؤال وجيه جداً
وقال لوالدته "ما الذي تسبب بالحادث يا أمي؟"
هالسؤال يللي ما كان اله جواب بهديك الفترة
غير كلمة "السبب مجهول"
بقي هالسؤال ببال هالطفل
"اه يا ربي كيف لنا أن أن نعلم أسباب حوادث الطائرات"
كمل دراسته وكان عنده اهتمام واضح بالإلكترونيات والعلوم
وصل للجامعة وحصل على بكالوريوس بالعلوم من جامعة سيدني
ليختص بعدها ويحصل بالخمسينيات
على دكتوراه بالكيميا ووقود الطائرات
فترة الخمسينيات يللي شهدت على حوادث كتيرة
طالت طائرات السفر المدنية
وكل حادثة كانت تذكر ديفيد بوفاة أبوه
فقرر ديفيد بالــ 1952 أنو صار بدها حل ما في مجال
ليخترع جهاز حساس بيسجل كل شي بيصير بقمرة قيادة الطائرات
ومنسميه اليوم "الصندوق الأسود"
د.ديفيد وارن العالم الأسترالي يللي بيرجعله الفضل بهالاختراع
قدّم اختراعه للسلطات الأسترالية بالــ 1953
بس اتخيلو أنو أستراليا اعتبرته عديم الفائدة فرفضته!
انزعج دكتور ديفيد وضبضب شناتيه وترك بلده واتجه لبريطانيا
بريطانيا يللي كانت عم تعاني بشكل كبير من مشكلة سقوط الطائرات
اجاها هالاختراع متل الدوا لتتبناه وتبدأ رحلة تطويره
وعام 1956 شهد على أول إعلان عن الصندوق الأسود
بالإذاعة البريطانية الأشهر بهديك الفترة الــ بي بي سي
عمل هالإعلان ضجة كبيرة بلندن والشاطر من شركات الطيران العالمية
يللي بيحصل على هالاختراع يللي صار مربوط بجملة
" إذا صرلك شي عالطيارة حقك ما بيضيع"
ليكون أول استخدام فعلي للصندوق الأسود سنة الــ 1958
وبعد مرور سنتين أصدرت منظمة الطيران الدولية للطيران المدني
قرار بيلزم جميع الطائرات بوجود صندوق أسود فيها..
استمر تطوير الصندوق الأسود وصار في شروط لتحليل بياناته
ومن صندوق صاروا اتنين واحد رقمي والتاني عادي
العادي بيسجل الأحاديث الصوتية
والرقمي بيسجل سرعة الريح والارتفاع
وتسارع للطائرة ودرجة انعطافها والاتصالات اللاسلكية
لونه مش أسود! أي مش أسود
لأنو مغطى بأشرطة إما برتقالية أو صفرا
بتعكس الضوء مشان تكون رؤيته سهلة واكتشافه سريع
طيب ليش تسمى أسود!!
سبب التسمية غامض تاريخياً وبعض المصادر بتذكر أنو
سمي بهالاسم لأنه وجوده ارتبط بالكوارث الجوية وحوادث الطائرات
كيف بيحفظ نفسو من الحوادث الضخمة؟
الطبقة الأولى حواليه من التيتانيوم الصلب والطبقة التانية هيي الطبقة الأخطر
مادة عازلة بتمتص صدمات السقوط من أي ارتفاعات
وبتتحمل درجة حرارة بتوصل للــ 1000 درجة مئوية
وبتتحمل أي ضغط مائي إذا كان سقوط الطائرة بالبحر
أجهزة التسجيل فيه مغلفة بمادة عازلة
بتمنع مسح المعلومات اللي سجلها الجهاز
بس يا ترى لو هالاختراع ما صار هل كانت شركات الطيران
اتخلت عن السفر المدني أم بتبقى الأموال أهم من الأرواح؟

للمزيد من الفيديوهات تابعونا على موقعنا الرسمي: https://www.mohtawa.ae

تابعونا على:
ـــــــــــــــــــــــــــــــــــــــــــــــ
Official Website| https://www.mohtawa.ae
Facebook| https://www.facebook.com/mohtawaae
Twitter| https://twitter.com/mohtawaae
Instagram| https://www.instagram.com/mohtawaae
محتوى منصة تهتم بالشباب العربي المعرفي من مواضيع تشمل "علوم - ثقافة - اجتماع - فضاء - تاريخ - طب - صحة - لايف ستايل - فن - رياضة - أخبار - سياسة - برامج