خلاصة الانسان ... كسر الخواطر

أصح تعريف للإنسان
بإنك تقول الإنسان هو ناتج كسور الخواطر
وبنتميز عن بعضنا
بحجم كسور الخواطر يلي عشناها
وكيف طلعنا منّا وكيف تعايشنا معها
والأهم .. كيف صرنا بعدها
اتغيرنا للأسوأ ؟! للأفضل ؟!
ضلينا مثل ما كنا ؟!
ولا اتلبسنا الكسر وصرنا نكسر ؟!
كسرة الخاطر هي أبشع إشي ممكن تعيشه
هو شعور اقرب للموت ويمكن ابشع
لما تكون صغير وتنضرب من أهلك
لما تكوني البنت الوحيدة بالبيت وكل العيلة كاسرة ضهرك
أو لما تشوف أبوك قاعد يصب وحشيته على أمك
لما تكون طالب وتنضرب من أستاذك
أو لما تفوت عالمدرسة و يا بتكسر عين زملائك
يا تستناهم يكسروا عينك
لما تكبر شوي وتحب ..
كسرة القلب بتكون أصعب كسرة خاطر
والحب يلي داخل فيه هو كمان ناتج
كسور طفولتك وطفولة شريكك
لما تكبر أكثر وينكسر خاطرك مع كل طريق تختاره
بالدراسة وبالشغل وبالفشل وبالواسطات وبالشللية
بينكسر خاطرك لما تحس حالك ضحّيت
وماحدا قدّر تضحيتك
ولما تحس حالك كبرت وفش حد يمسك إيدك
بينكسر خاطرك لما تبكي كل يوم آخر الليل على مخدتك
ولما تقرر تتصور أو حد يصورك
مجبور إنك تبتسم للكاميرة , وتفرجيهم إنك قوي
بس عينك .. مرآة حياتك يلي هي عينك
رح تحمل كل كسووور الخواطر بـ لمعتها
وقتها تنزل الصورة والكل يمدح جمالك
بس يلي بيفهمك .. هو يلي رح يواسي عينك
ويلي بيواسي عينك .. هو وحده .. يلي رح يعينك

تابعو يومياتي على الانستجرام ... Ahmadm.massad
https://www.instagram.com/ahmadm.massad/

حسابي على الفيسبوك ... Ahmad M. Massad
https://www.facebook.com/ahmad.massad

تابعو قناتنا الخاصة بالالعاب ... ( Fortnite ... Dota 2 )
https://www.youtube.com/channe....l/UCuq1rIN_q-Vk52Ik-

يمكنكم تقديم الدعم لكي نستمر في تقديم المزيد من الفيديوهات على
https://www.patreon.com/Ahmadmassad

#احمد_مساد
#AhmadMassad
The Joker
برنامج صفر
ابو فجلة