حتة حكمة - اخرج من نطاق الراحة إلى نطاق التحدي

----------
ادعم القناة على باتريون : http://bit.ly/PatreonAMA

حمل تطبيق القناة http://bit.ly/AlibookApp

تابعني عالفيسبوك: http://bit.ly/ali-facebook
---------------------------------------------

معدات التصوير والمونتاج
http://bit.ly/AliBookTools

تسوق الكتب ومعدات التصوير في متجري على أمازون
https://amzn.to/2zRvv8i

----------

فكر معايا في مهارة مهمة إنت حابب تتطور نفسك فيها..

نقدر نقسم مدى تعلم المهارة دي بداية من الصفر..
وحتى أعلى نقطة إنت بتتطمح للوصول ليها .. لـ 3 نطاقات

النطاق الأول وده إسمه نطاق الراحة Comfort Zone
وده بيمثل مستواك الحالي في المهارة دي ..
ممكن يكون كبير أو صغير على حسب مستواك الحالي.
النطاق ده ما بتواجهش فيه أي تحديات ..
لو طُلب منك أي مهمة في النطاق ده بتعملها بدون عناء

النطاق التاني وهو نطاق حجمه صغير بشكل ملحوظ ..
وده إسمه نطاق التحدي الأمثل Optimal challenge zone ..
بعض الكتب بتسميه نطاق النمو Growth zone
نطاق التحدي الأمثل هو زيادة بسيطة فوق مستواك الحالي
بنسبة ما بين 1 إلى 5% على حسب المهارة اللي انت مهتم بيها

النطاق الثالث وده إسمه نطاق الإرتباك Panic Zone
والبعض بيسميه نطاق الخطر Danger Zone
وده بيكون أعلى بفرق كبير من مستوى نطاق الراحة بتاعك

إيه فايدة التقسيمة دي ؟ ..
فهم التقسيمة دي هيساعدك تنمو وتتطور نفسك بمعدل أسرع
وكمان يحميك من نوعية الفشل اللي بتسبب الإحباط واليأس.


لو عاوز تطور نفسك وتنمو في مهارة معينة لازم ما تستقرش في نطاق الراحة
لأنك مش هتتطورأو تنمو لو فضلت تعمل نفس الحاجة بشكل مستمر


وفي نفس الوقت تتجنب وتحذر من إن حماسك يخليك تحاول تدخل نطاق
الإرتباك أو الخطر ..لأن العواقب ممكن تكون سيئة! ..
أقلها الإحباط واليأس بعد الفشل المتوقع!

التصرف الحكيم هنا هو التركيز على نطاق التحدي الأمثل ..

اللي هيحصل إن بعد فترة من المحاولة داخل نطاق التحدي الأمثل ده ..
هتتمكن منه ومهارتك هتزيد والجزء ده هينضم لنطاق الراحة ..
فيتحرك نطاق التحدي الأمثل لمنطقة جديدة كانت من ضمن نطاق الخطر قبل كده!

يعني مع الوقت اللي بيحصل إن نطاق الراحة في المهارة المطلوبة بيزيد
ونطاق الخطر بيقل .. وهكذا لحد ما توصل للمستوى المرغوب
-------------
الفترة اللي تلاقي نفسك فيها بتعاني أو مضغوط
بسبب تعامُلك مع شيء جديد إنت مش متمكن منه
هي دي فترة النمو والتطور! ..
دي الفترة اللي بتكتسب فيها الخبرة بالشيء الجديد ..


ومع ذلك دي الفترة اللي معظمنا بيحس فيها إنه مضغوط وقلقان
لأنه مش متأكد من النتيجة!
ومحدش فينا بيحب يعيش في الإحساس ده لفترة طويلة! ..
لذلك لو كان الشيء ده مش مفروض علينا في شغل ومجبرين عليه
غالباً ما بنحاولش نعمله من نفسنا بشكل اختياري
وبنحرم نفسنا من فرصة التطور والنمو في المجال أو المهارة اللي مهتمين بيها!

لحل المشكلة دي ..
إحنا محتاجين نفصل بين إحساس السعادة وإحساس الراحة
معظمنا لما بيتخيل حياة سعيدة بيتخيلها حياة خالية من المسئوليات
وأحياناً خالية من الشغل بشكل كامل!


التعب اللي هينتج عنه زيادة في المهارة والخبرة هو تعب يستحق ..
في أخر اليوم اللي تعبت فيها مع إنجاز هتكون مبسوط فيه أكتر من اليوم
اللي متعتبتش فيه بس ضاع بدون فايدة.


الإنسان بشكل عام بيكون سعيد أكتر
لما يحس انه بيتطور في اتجاه هدف بيسعى له.

في كل مرة تواجهك صعوبة في مجالك أو تحتاج تتعلم حاجة جديدة بس صعبة ..
خد نفس عميق .. وبص للموضوع بأنه فرصة للنمو .. ..
وإن بعد فترة قصيرة من التعب الشيء الصعب هيبقى معتاد ..
لأنه هيطلع من نطاق التحدي ويدخل نطاق الراحة ..
فترة التعب والقلق هتعدي لكن العائد اللي حصلت عليه هيبقى ويستمر

أتمنى تكون حلقة اليوم مفيدة .. اشوفكم في فيديو جديد قريباً
سلام عليكم