اسامه القصار عشانا خروف محشي خضار وملفلوف في ورق الموز ومشوي على الفحم

مساكم الله بالخير اخواني المتابعين وشكرا لكم على كل كلامكم الي كتبتوه قرأته كله وحطيت لكم على كومنت لايك

عشانا امس في مزرعة ابونره العازمي
كان طلي صغير خروف وزنه ١٠كيلو جزاه الله خير
سويت له حمسة خضارطازجه وحشيت بطنه وخيطته وبهرته ولفيته في ورق الموز موجود في لولو هايبر ثم لفيته بالألمنيوم بعد ورق الموز علشان يحمي الخروف من سموم الألمنيوم ويعطي طراوه للخروف ورطوبه ويحميه من الاحتراق ولايغير بطعم الشواء وحطيته على الفحم من فوق وتحت وقلبته بعد ٤٥ دقيقه مدة الطبخ ساعه ونص الى ساعتين
وطبخت معاه رز على اذنبة الخروف الليه وبهارات صحيحه وبصل
ورشيته بالزعفران والهيل وسويت للطبخه حشو من الزبيب والحمص والبصل
ونچبنا عشانا وسدحنا القوزي المحشي فوق الرز
وتعشينا عشاء فاخر جدا وكان الحضور تسع اشخاص كفانا وزاد والحمد لله
وسهمكم العافيه والصحه اذا عجبكم المقطع لاتنسوني باللايكات والكومنتات الجميله